莫己若叻番次

猪拉多纳

喺上個禮拜五參加「觀瀾湖世界職業明星邀請賽」嘅阿叻陳伯祥，除咗鍾意打高爾夫球外，不嬲賽馬先係佢嘅第二生命，難怪尋日佢一樣入場幫愛駒「莫己若」打氣，結果呢隻馬不負所託，順利勝出第三場四班谷草千八米，叻哥又可以同老婆黃杏秀開開心心地影張拉頭馬相。
       
莫己若馬主陳伯祥（右二）與太太黃杏秀笑開懷。

講開呢隻「莫己若」，前一次就同郭富城嘅愛駒「愛的呼喚」同場，可惜就氣管有痰三甲不入，反而城城隻馬就一出即勝。不過，今次終於輪到「莫己若」建功，等叻哥可以叻番次。至於何良賽後就話其實「莫己若」本身質素唔差，只係之前做過兩次手術，攪到戰鬥力得返八成左右，好彩依家隻馬嘅健康穩定咗唔少，係四班贏番場都好合理嘅。
       

何良昨日除咗贏阿叻隻「莫己若」之外，第七場再贏「魅力星」，順利起孖，與潘頓今季第一次合作就取得勝仗，相信兩人好快又會拍檔搵食。