竞骏才子超级精神胜利旋峰锦衣卫

猪拉多纳

　　一直以来，田草C+3栏都係唔多利於後上马，排好档而跑法主动之马，往往早着先鞭，如果今日唔係有咩大变动，不易出现反高潮。而今日骑练形势分得幾散，唔觉边个较多子弹。　　

　　第1场 第四班（60-40分）1200米

　　「中国天使」刚在此程後上入Q，当日以类似跑法上名並唔多，尊重其赛绩，希望今场追得切。

　　「仁心仁術」唔係慢闸，上场未必留得顺，今次1档如略为跟前，效果未必如一。「太阳好好」太多分在手，试好晒闸先跑，重视转仓初出首回。再拣落去已感困难，勉强可考虑「叻叻仔」与「自我本色」。　　

　　第2场 第五班（40-15分） 1600米　　

　　「夺錶」除了内闪问题困扰，今次跑此赛道一样有难处，後上威力或被削弱。「辣手先锋」唔係外闪，上场可能赢咗，当然，计落输畀「香港发」赛绩够坚，更重要係「了」身马赛後操得而唔跌磅。

　　「福誉」大胜後表现未能接轨，期望回一回又会唔同。「辣得醒」唯一变数係换上潘顿。

　　「怡情养胜」上场跟得前，跑法唔啱，输得唔远算合格，惜今场排11档。「华丽堡」之前缺课係忧虑。　　

　　第3场 第四班（60-40分） 1000米　　

　　「精灵勇骏」年半冇跑四班赛，落班可能变巨人，加上，之前廐侣「京城精英」又係落五班即用韦达（跑P），呢类部署唔使估战意。

　　「路路好」唔係唔好，2档要视乎早段决心及际遇。「龙城飞将」试到第三个大闸，姿态比前略进。「历山传奇」如果临场唔急、冇标汗，应该会有两脚。「军刀」排档外移，机会比上场好多多声。「夺目商人」降班兼缩程，大大减低难度之下，可能跑得番。「开心欢笑」弊在1档及後上跑法。

　　第4场 第四班（60-40分）1400米

　　「竞骏才子」初出唔在状态，所以睇唔上眼，不过，输完肯落力做嘢，加眼罩试大闸，末段认真骑而反应好，之後再安排一课接一课拍跳，操练工序充满出击意欲，呢匹薯唛係时候变身。「胜利旋峰」要博有冇三剂（多年来未试过），单计跑法及近绩则要拣。「松风」人马皆论尽，才令上场发挥不出十足水準，但今次14档仲难跑。「首饰多宝」除非朝早识扮懵，或身怀高质，因以目前进度真係唔够。「超级精神」希望掌握到今场形势，3档应可由头赚到尾。「锦衣卫」加程撞板，尝试加配件及转程，未尝不可。

　　第5场 第四班（60-40分） 1800米　　

　　「金銮大殿」转程令能力进一步升级，但12档稍有风险，要睇早段泊到咩位置。

　　「精密纺」跑法安全又放心。「好球」初出唔锺意，跑落却有惊喜，复课後则觉醒神咗。「电讯至尊」近况係同场之中较标青之一。「精唛」上场已预期会跑番好，回到田草更获充分发挥，加罩得唔得就两睇。「喜欣赏」输际遇才会令胜後冇影，转场而排好位，小心翻身。　　

　　第6场 第三班（80-60分） 1800米　　

　　「飞翔星」初出状态不足，尚可蚀位後上有势，留下良好印象，拼後工夫肯去迫，並加程配合，到位。

　　「旅遊名牌」上场赢来比预期仲犀利，再追。「安赏」进度的确大，但田草未必係佢世界。「得男」胜在準，外地赢过2000米，唔担心气量。「欢欣满载」上场跑法极似「经典皇牌」赢之前嗰场！小心。「晴天」刚赛前已指出曾缺课，且大闸唔起眼，输完工夫积极，热完身就唔可以睇小。　　

　　第7场 第二班（105-80分） 1000米　　

　　「崇山宝」一向演出极準，开气巩固了状态，今场又可发挥出直路王本色。「活力飞驹」让磅差距再加码，唔易又一次击败前驹。

　　「一宝」工夫稍有沙石，唔係冇忧心。「熊英雄」隔晚票数完全唔对路，话晒係直路未甩过三甲，唔明点解冇飞？！「幸运雄威」工序似晒幾匹初出即有表现廐侣，今场唔可以睇小。「幸运全胜」及「心理学家」，回到此程会有唔同发挥，边线脚。　　

　　第8场 第三班（80-60分） 1000米　　

　　「御锋」9档较易移出外栏，因应今场跑线，发挥及际遇应该比上场仲好。「爱宝驹」大步马转攻直路赛都得，只要唔係好似上场意外多多，可争佳绩。

　　「火燎腚」偷袭可一不可再。「龟兔竞跑」1档大忌，惟最近大闸走势幾吸引。「喜盈门」上场作正选，升班加上休後第二仗，稍减信心。「旺綵」阉完唔觉有进。「超新鲜」凭速度或可争P。　　

　　第9场 第三班（80-60分） 1400米　　

　　「友莹果」如继续受惠步速慢场合，有权带到。「贺喜」一向赢完例冇，上场赛绩破格，值得再跟。

　　「好心思」唔易控制，10档加小将，未必搞得掂。「智高星」转配件要帮好多，先至有机会争胜，事关单看上场完全唔叻。「欢乐时光」加程合理，以刚赛轻胜过程，升班唔会吃力。「香港神驹」连跑两场後，等到落班终肯换配件，如留放做妥，随时唔同晒。　　

　　第10场 第二班（100-80分） 1800米　　

　　「阳光普照」负磅轻，跑法段段有，排4档，形势唔曳，唔係冇懵博。「格哥儿」跑田草长途，远比谷草一哩啱。

　　「同个世界」今场配搭比上赛似样得多，可信性大啲。「百事神驹」此程不比1600米失色，係睇胃口。「劲高手」全程走三叠，可顶到最後百幾米，上场算係叻。「满地宝」最近大闸追势唔算特别。