晨采出头在望

猪拉多纳

　　第六场三班1200米。「旋风魅力」之前两季初出俱不上名，上仗居然有突破，在此程後上跑P，当时步速快，的确利追属於受惠者之一，不过，严格讲佢上场唔係咁够状态，事关早课表现唔係吸引，唔排除到今季仲会有少少进步，评分未必冇得再上。

　　回顾上场走势，外档出闸令早段焗住留得後，跑至直路头又唔係即刻摆正踩油，如果唔係略有阻窒，以末段追劲，该场二马「强风骏马」应该会顶唔住。上季此马两战A栏此程不胜有位，郑俊伟等都等到今期至派佢跑，睇心意应想继续搏。

　　第七场三班1650米。「晨采」转泥地撞板，重返此程係明智之选，唔使估场地性能，上季和今季早已有證明，唔使再面对上场前不利变数。

　　坦白讲，本身唔係有咩特别板斧，实力在三班约值中级，而跑法又冇咩变化，只得跟前呢瓣，好在今场对手唔强，又唔多马走，算係好跑；隻马试跑唔觉有唔妥，感觉与上赛前差不多，仍然保持在高点。希望9档唔好累到佢，早早泊到埋栏，顺跟「心中有程」赚埋赚埋或可出头。