利钱伯爵博得过

猪拉多纳

　　上次田泥夜赛算係好「慷慨」，点解阿栋会咁讲，事关当晚唔算爆得好甘，起码唔係场场Q派过千，但就硬係有啲冷门楔入三甲，总之，令到原本正路赛果係都要扭一扭。所以，有时跑呢类赛事，唔使计得咁足，有啱心水冷马，不妨随心而发，可能带来惊喜。

　　第五场三班1200米。「无敌」上场赢到一哩，的确幾出奇，以为佢好短瘾，点知可以赢得咁轻鬆，但唔单只係形势使然，隻马本身的确有进步。四升三班转回短途，唔知点解有咁样部署，阿良谂乜？我估唔到，不过，有一个月重新调整，应该够日子，今仗趁勇又负轻磅，咪睇小。

　　香槟岁月加程掂

　　第六场三班1800米。「香槟岁月」擒日已经有「风」吹，手足透露今仗有幾大赢面。至於，讲到呢匹马实力，上次初跑泥地，仲要加程至一哩，一样後追有势，真係幾犀利，如果人马当时稍为再跑好啲，根本已经上到名！睇过上场追势，再跑长啲冇话错，而呢次排内档，唔使留得後，更合此马发挥，成绩可望再提升。

　　第八场二班1200米。「利钱伯爵」隔了一个月冇跑，期间工夫好肉紧，试大闸亦轻易胜出，睇阿蔡手法，无非想操好交代。而係人都知隻马麻烦难骑，赛前韦达试完闸唔骑，但唔代表唔得，话到底，来港後唯一上名在此程，如果换个郭立基带来好赔率，值得博博。