大將軍開竅打疊W

猪拉多纳

吳嘉晉擒日第二場騎隻「好好運」心存大慾，可惜臨門影相飲恨輸咗畀「電訊超星」，不過響第五場師傅再度委以愛徒重任，終於憑隻「大將軍」落飛贏馬補番數，加埋廐侶「甜蜜一角」串Q。
       
大將軍再下一城，吳嘉晉興奮莫名。

雖然同場畀隻「豹顯神駒」影相分咗半個平頭亞軍，但葉楚航包辦呢條馬房Q，連贏彩金依然超過兩千銀，都算相當和味。
       
葉楚航(左)、吳嘉晉(左四)
甜蜜一角串馬房Q

對於「大將軍」今場升班增程再贏馬，葉楚航就話唔係太意外，事關呢匹屬於慢熱中距離馬，上次贏馬畀安國倫省過一仗後，成隻馬開晒竅，加上今次賽前，已經預計呢場無步速，所以早已吩咐定佢盡量擺前跑，結果響佔咗先機的情況下，直路透出就此直帶到底，航哥話兩位馬主周偉樑與袁沛林，由佢開倉至今支持到依家，一連打疊贏兩場，總算係佢嘅最佳回報。