贏得隨時帶到

猪拉多纳

　　今日沙田馬場8草2泥賽事，坦白講，有部分場次點刨都無從入手，不過，又唔代表冇賭頭，唔知大家有冇發覺，近期不論谷草或田草賽事，賽前感覺係亂局，反而賽果幾正路，兼且派彩又唔係冇得分，所以，季中呢類場合，又唔使太過抗拒。

　　第二場三班1200米草地。「風花雪月」上場表現比預期失色，唔知發生咩事？可能直路賽性能唔係咁好。睇隻馬前仗初出走勢，冇理由三班留得住。今仗回到1200米，對手唔見得比前仗勁，希望多了經驗之後，隻馬進度上升，便有機會出頭。

　　第五場四班1800米草地。「贏得」3歲馬目前仍然未成熟，性能則漸漸定型，中距離賽事唔多合腳法，長途方是最佳出路。今仗改跑田草1800米，比起谷草一哩有好冇壞。而呢類馬好啱馬偉昌發揮，步步尺七，必然要硬功師傅，所以，連跑兩場，成績愈見進步。如果3檔起步，早段守到前列位置，且戰且走，隨時帶到。

　　小宇宙賽績出色

　　第十場二班1200米草地。「小宇宙」加程出戰1400米成績普通，縮回此程做法合理，季內初出在此程僅不敵「山頂」，賽績出色，呢次一樣抽到內檔，賽事形勢應該冇大分別，早段霸住好位，極之好跑。加上，呢匹馬今季未交代，大摩唔會放鬆，一定搏到贏。