傲男齊歡笑經典皇牌勝哥兒

猪拉多纳

　　今日沙田8草2泥賽事，草地採用A欄，賽道比較利於後上馬，前領馬略為減低優勢。至於泥地方面，經過之前翻土工程，賽事模式若一如公布的話，同樣係有得追。

　　「傲男」賽前準備比起之前幾仗積極，本身在二班此程長期係前列常客，如重磅及外檔唔係構成太大壓力，三甲分子。「齊歡笑」此程一向準繩，但總係欠冠軍相。「摩法神采」情況與前駒差唔多。「勝哥兒」季內兩仗表現未算突出，但試泥閘追勢勁，轉場隨時唔同晒。「經典皇牌」係得上場名次較後，再之前兩場其實好有走勢，隔一隔回到贏馬路程，小心返嚟！「加州動力」今季兩戰均有不錯表現，數月前泥閘留下好印象，而外地曾勝膠地，最睇唔透。

　　「上浦駿將」五班此程好手，惜與上賽相隔日子唔夠耐，交唔交得出最佳水準真係兩睇。「大少爺」狀態早有轉機，等到一次排到好位，放得順，有權帶到。

　　「時時有機」演出漸見穩定，超輕磅亦屬利好因素。「鑽石瑪瑙」上場輸近，或係跑線有利關係，不過，上季同程曾追得近，邊線馬。「快達小子」可能現時重返此程比1400米好。

　　「風花雪月」剛仗失望，博轉程跑得番，但賠率若太熱，就唔值博。「樂有贏」剛仗走勢復甦，返回勝途，有本錢爭勝。

　　「轟炸機」9檔有憂慮，視乎早段楔唔楔得好。「爪皇盛水」又排14檔，好在今場形勢與上賽近似，可能蝕得起。「快利多」分數比上季首捷低，重返田草，就算路短亦有危險。

　　「貝利奇」愈來愈乖，跑法多變，加程可能更好，12檔留後跑，由於今場應有步速，直路追得切。

　　「自我本色」工夫做得多，換埋人，動態似樣，但6檔如被擯出外叠，未必掂，太熱不宜博W。「敏歡騰」唞過，或要重新熱身撻起。「首席」表現好壞，視乎臨場情緒如何，希望配件有助。「電子福星」剛仗放得快可上名，值得跟進。「海南花梨」耐冇跑、曾缺課兼轉馬房初出，純以兩大閘走勢卻收貨。

　　「龍城飛將」唔發脾氣即在上場入Q，步速慢且直路抄出外檔一樣克服到，在四班過客一名。

　　「誠信寶駒」初出放入第二名，演出討好，惟今場外檔及重磅，對此匹3歲馬造成壓力。「帝聖駿駒」場地、路程和排位夾啱，條件屬季內最好一場。「好威龍」難再慢放，成績未必保持到。「添歡笑」近仗走勢一再失望。「銀飛龍」又排外檔，A欄留後追未算失利。

　　「正紅旗」上賽轉配備及換人，比賽時明顯少咗兩頭擰，且尾段貫注夠韌，嘗試加程至長途，或試出彩虹。

　　「贏得」靠檻冇爆炸力，此程與谷草一哩均合適。「京城三寶」準備上少有跳得稍多，有意思郁手。「多豐裕」近而冇贏面。「福譽」銳開，9檔唔影響發揮。「牛精威旺」要靠慢步速始有機會。「大有作為」長力掹掹緊，爭P。

　　「無敵」連場有走勢，回到此程，以之前贏馬水準，因應好檔及輕磅，唔會冇得揮。「新強勁」剛仗路短交出最快末段時間（全日4場），若進度有轉機，跑此程煞食。「非常好」唔知邊場好！？「福到多多」跑番起狀態，升班冇問題。「香檳歲月」留放做得啱的話，此程一樣夠威力。「齊大勝」試閘課比課好，但此廐PP初出通常唔得（近3季10匹全負）。

　　「天久」如果肉緊啲，上場可能有殿軍，但亦睇到直路賽唔係佢杯茶，縮回此程自然唔同。

　　「愛跑得」與「甜將」國際賽劣勢之下入圍，在今組夠用。「時尚風采」剛仗人馬發揮完全唔成體統，勿介意，唯一擔心唞得未夠。「恩格斯」恃住大勇，且加程有利。「夢幻十一」復出第二回，並有好位及路程配合，有力爭P。

　　「金秋」以初出同程及翌仗表現，平磅與一批同齡馬對賽，實力高一線。「事事為王」初出演繹唔好但有P，質素幾高，今次轉路程有助。

　　「大運財」此程漸感勉強，最多爭腳；「歡樂時光」也有同感。「蒜頭仔」情況剛好相反，可能愈長愈妙。「醉必勝」、「自由式」及「將男」，剛仗演出各有唔同程度吸引之處，冷門可拖。

　　「小宇宙」加程失敗，別無他法，回到短途合理。「綽力之城」轉場唔掂，返田草實際。「羅馬兵」上仗1000米爆段極速拉士，但改跑此程未必效果一樣，尤其見隻馬暫時出腳可能係最啱直路賽。「威威具星」開竅後未輸過，當打必須重視。「旺當家」好位亦最多爭腳。「富貴金龍」食老本；「強風駿馬」近績靚，納於邊線。