爪皇豪火 賽績硬淨

猪拉多纳

　　第六場三班1650米。「智高星」除了季內首仗跑至名次大落後，打後6場全數跑入三甲，田草1400米及谷草一哩都冇問題，但準還準，跑落漸漸冇多大進步空間，評分漸到樽頸位。

　　上場加磅至131磅，明顯陣上表現已被拖低了，如果唔係韋達走位搭夠，未必保得住第三名。但話分兩頭，由於今場數匹主要對手均排外檔，其餘好多又唔成氣候，若果「智高星」換人後依然交得出剛賽演出水平，三甲有着落。

　　第七場二班1800米。「爪皇豪火」季初首兩仗冇狀態可言，連續兩場跑到冇影完全正常。由第3仗開始，直至上場為止，此馬場場跑入前五名，唔理該場路程係1600米或1800米、步速快慢，以及賽道有冇得追，總之，末段梗會見佢湧到上嚟。

　　表面上，此駒轉戰谷草，直路短仲難追，但另一方面，其級數比大部分對手高，曾經狂追「魅力知己」、「得男」，賽績極具分量，若果今場段速唔係拖得太慢，直路就係佢世界。