按一按火燎腚薑餅人好利佳

猪拉多纳

　　今晚谷草8場A欄賽事，內檔馬冇明顯優勢，排中外檔不拘，跑法更加唔係一味靠放。而比較特別係對上三期同一賽道那24場頭馬，只得1匹大熱門贏得到！「按一按」三班此程最強，減夠分落班即刻操住等今場，重磅雖然有壓力，寄望路程性能及好位搭夠。「火燎腚」內側冇隻夠佢快，要攞欄唔難，唔係放得過快，坐住有P。「薑餅人」近績最有級數，問題係初跑谷草及8檔，多與少有風險。「好利佳」11檔同樣有危機，初上三班也受考驗，作配尚可。「金笸籮」操練就住，亦嫌休賽期不夠，就算大前仗有驚喜，只限冷敲。

　　「奄尖大少」前仗咬緊牙關做工夫，搏落去梗頸四，賽績顯示了退化程度。隔了一場降班跑，若重磅扛得住，三甲必有。

　　「華倫天奴」及「大地王者」，剛在賽事中後上有勢，結合今場形勢，將得到更好發揮。「大東海」上賽跑得差全因騎師問題，尚且獲殿軍，正處穩定期，惜縮回一哩，適應力存疑。「好好運」之前連場追得勁，上場則被極慢步速「拖死」，由於是賽應有步速，機會大不同。

　　「時尚風華」連仗受惠慢步速之助，未必算叻，但今次仍然有機會再賺過，排埋2檔又夾啱，膽材。

　　「新薪」上賽前在1月初曾停課，令到剛仗表現冇前冇後。好在復課操練進程無礙，再加上落班及轉程，條件唔同晒。「快快贏」草地賽1200米似冇泥地咁好跑。「好精伶」係驚輸蝕跑法極被動。「好玩神駒」今次賽前大閘明顯冇上次咁懶，如冇畀大外檔累死，成績至少可保持。「盈驥」此程限爭三四名。

　　「喜寶龍威」唔怕步速慢，最怕遲望空，3檔在早段易搵生位，處境安心。「駕寶」連續兩場受益，是賽一樣有可能；「大將軍」情況與前駒相近。「萬眾期待」多做工夫再瘦落去，係有憂慮，純計近績當然有得爭。「盈威勇士」回升四班首仗演出失望。

　　「財源來」蝕步速可能性大，恐追極得個P。「富逸」有班，前仗放得急唔斷，隔一隔在四班跑，有冷味。

　　「好香港」疏操和腳傷係上賽跑得唔好元兇，今次準備上再冇問題，縮回谷草短途，對手冇咁惡，唔係過熱，捧W。「團隊精神」唔係出彎失蹄及轉位需時，上場未必衝輸，老馬唞夠再出，有望保持。

　　「海之宏」有速度兼1檔，形勢好跑；「帝聖駿駒」畀11檔考起，早段如可切入二叠前列，尚且有一爭之力。「競駿才子」發燒未知有幾大影響；「奪目商人」8檔要博早段楔得好，俱為邊線馬。

　　「綠豆爽」再遇「可愛人生」，兩者剛仗發揮均可人，由於前駒加磅，後駒加眼罩，實力可能拉近好多。「業盛於和」要前兩駒一齊失準，始有資格坐正，爭腳居多。「綻放美麗」放急咗唔斷，上場一哩表現勁，跑長150米則樂觀評估會好。

　　「利駿」此程極限，靠慳才可上名。「幸運勝利」3歲仔難度大。「足智多謀」換人如發揮得宜，可變身。

　　「綫路明星」當打，留在三班就算負重，依然可獨當一面。「你知我贏」撇開上場無故外閃，再之前其實一再跑得出色。「玉峽生輝」操練及出賽時間夾得好，若9檔唔係令早段被迫大外叠，有資格爭前列。「時來威龍」及「財神駕到」博賺跑法。「蓋世子牙」近賽較好多對手討好。

　　「心中有程」目前早段唔快，好在1檔有天然優勢，如果交得出上賽追勁，屬主角之一。「信心十足」唔係大外檔起步，發揮及走位可能好得多。

　　「環保戰士」跌磅多，今仗期望維持到而已。「萬醒駒」谷草短途太準，唔拖唔得。「中國動力」近仗人馬唔夾，今次終於肯換人，有埋2檔，最佳冷腳。