喜寶駒賀柏寶復出

猪拉多纳

澳洲好手柏寶早排停賽四日，兼且錯失機會夥拍三月二日捧走港澳盃嘅賀廐馬「太陽好好」上陣。不過，賀賢一向都對呢位鄉里兼好拍檔有情有義，尋日趁柏寶復出即刻彈隻試閘譽滿欄邊嘅「喜寶駒」畀佢，雖然呢隻初出馬喺頭場四班一千米直路賽起步慢一慢，但依然以輕鬆姿態擊敗對手，順利保住1.5倍熱W之餘，兼且幫佢復出即贏。值得一提，原來「喜寶駒」嚟香港前喺澳洲試嗰課閘都係柏寶操刀，依家再幫隻馬一出即勝，認真有緣。
       
喜寶駒按韁贏馬姿態驚人。
集中火力一千直路

今季16W悉數喺田草贏到嘅賀賢賽後就話「喜寶駒」仲有啲緊張同稚嫩，所以出閘慢一慢，但之後隻馬走勢都好定，拉士稍畀已經過晒，表現都令佢好滿意，佢仲話呢隻係正宗短途馬，日後可以跑千二米，甚至轉跑谷草都冇問題，但現階段就集中跑一千米直路，遲啲先再諗轉路程。