仁心仁術 大賽日開齋

猪拉多纳

一向喜歡喺大賽日出擊嘅好時代團體，名下馬「正本仁心」以往四W先後於賀年盃、香港金盃、香港盃等大賽日贏馬，今次輪到「仁心仁術」接棒，尋日喺韋達胯下於打吡賽日打開勝利之門，為練馬師何良帶嚟今季田草第二W，練者與韋達呢輪擦出火花，對上一場頭馬「奄尖大少」亦係由佢操刀，相信呢對配搭貴精唔貴多嘅合作，短期之內依然仲有好大重視價值。
       
仁心仁術征戰三季終開勝門，馬主團體再一次於大賽日揚威。

對於今場取得處女勝利嘅「仁心仁術」，馬主好時代團體經理人梁柏濤，坦言對呢場頭馬期待已久，過往因為馬匹健康有啲問題，表現先至咁反覆，其實今季連場上名嘅表現並唔差，只係遇上強手如「駿馬名駒」或「太陽好好」，後駒其後更加贏到上一班，所以今次遇上較弱組嘅四班賽事，賽前都好有信心，結果韋達不負眾望，為好時代團體再嘗拉頭馬滋味。