海鑽石換人搏盡

猪拉多纳

　　今日一戰有啲似上周日局面，好多熱到辣手之馬在部分場合，賣到十幾廿蚊比比皆是。點樣去揀，唔係冇學問，唔好以為全熱門是但買都會中！表面上某些馬賠率熱透，但唔代表機會壓一，韋達又好，潘頓坐騎亦好，一樣要深思熟慮先至好擺銀落去。

　　第六場四班1600米。「馬來之珍」初出跑中距離，已經好有難度，仲要出自比較慢熱嘅告廐，所以，一出入Q賽績點都要睇高啲。既然上場14檔冇影響發揮，今仗應該不成問題，雖然再遇上「友誼大使」，彼此鬥進度，未必會一輸再輸，再者，睇隔晚票數，後駒比較弱，可能係警號。

　　第七場三班1600米。「品學兼優」蔡神仙年青武器，跑4場冇W有P，近兩仗贏完又贏，擺明係會扶搖直上，四升三班根本冇阻力。除此之外，今日蔡軍大舉出動，好多配晒韋達，擺出一副連場出擊陣腳，呢匹新勝馬，冇理由唔係重點之一。

　　第十場二班1400米。阿棟唔想秋後算帳，或者講到件事好嚴重，小事化大，不過，上場「海鑽石」發揮真係令人「痛心疾首」，睇完嬲到震！呢點亦可能係易配最大原因，但無謂多講嘞。總之，今場轉用馬偉昌，騎練正值合作佳期，近排成日贏馬，今場得此實力坐騎，點會唔盡力而為，到底二班夠唔夠贏？今場跑完就知，個人則滿有信心。