淋地馬隨時發惡

猪拉多纳

　　噚日不停咁落雨，一度黃色暴雨警告，今日天氣一樣唔穩定，可能落住雨跑馬亦唔話唔埋，就算冇雨，場地已受天雨影響，唔可能會在好快地作賽，因而考起部分馬匹。

　　本來谷草C欄，內檔幫到手，偏偏場地起變化，內檔可能天堂變地獄，經常雨中作賽時候，騎師們個個轉完直路彎「篩」晒出外欄，極少數會走入去，便知內欄到底有幾大障礙。

　　以上述理論入手的話，今晚排外檔未必好差，可能由蝕變賺，當然，唔識跑變化地，就講咩都冇用！

　　第五場「怡勝」、第七場「大把在手」及第八場「家樂飛」，以往曾在變化地跑到好成績，今晚因緣際會，可能見水即生，跑出比平時更好水準。如果三揀一，「怡勝」最合心水，記得有次大雨淋漓，一樣衝得勁，唔係一般游水馬咁簡單，又難得降到四班，屬黃金機會。Jack