喜勝多升班都掂

猪拉多纳

　　谷草C跑道已經唔好賭，整多一場大雨，淋熄埋本來唔多嘅投X意慾。阿棟唔係倒米，好似上期咁，「海鑽石」，我認為唔怕買，勝在穩穩陣陣。但今期8場賽事，幾難搵到類似馬匹，最衰仲係有部分馬隔晚賠率完全唔合理，令形勢變得更難入手，奉勸閣下今晚特別小心，冇心水，不如睇跑馬。

　　第二場四班1200米。「勁感」兩出均跑谷草短途，前仗1000米追入殿軍，上場加程至1200米，名次提升一級，如果該場唔係在直路一度被阻，可能更加接近。高廐質新馬愈跑愈好例子見得多，唔排除此馬都係一樣。只可惜後上馬已經被動，變化地又唔知應唔應付到，唔係冇危機，獨贏如果冇4倍以上，真係唔值得博。

　　第六場三班1650米。「瀟灑駿駒」外地多次在軟爛地跑得好，而季初在三班田草好黏地，曾經放得有聲有色，相信今晚場地不會對牠有好大影響，可能會幫到亦未定。至於上場即刻走樣原因，或者田草真係難捱，場地性能唔得就係唔得。而睇隻馬前一仗贏此程時，雖然係四班，姿態極輕易，三班負輕磅，冇理由唔掂，冷門可敲。

　　第八場二班1800米。「喜勝多」分低冇得入選打吡，都冇得好講，不過，今季表現確係抵讚，跑5場冇甩過三甲！由10月尾開始搏，跑至2月仍然生龍活虎，苗禮德應記一功。今次升班而戰，對手強但本身負磅減輕，變化地又冇問題，咪睇小。

　　點買法

　　正如開場白話齋，可以的話，今晚應該忍手，但投X策略照畀；「喜勝多」季內演出夠準，全晚挑1隻買WP，除咗此駒，其他場次啲馬唔多鍾意。而QT重心放埋在尾場，亂局一於博幾匹輕磅馬。