佳景良駒換人出冷

猪拉多纳

　　賭博士昨日提及，上日潘頓搏殺屢遇伏兵，一眾本地騎師充當攔路虎，前者胯下的坐騎「辣得醒」、「上浦駿將」和「光輝之星」皆跑位置，同場頭馬全部出自本地薑之手，純粹巧合？賭博士不知情由。然而事實擺在眼前，除了韋達之外，本地薑明顯是潘頓剋星，明日潘頓有七匹坐騎，賭博士奉勸大家，同場吼韋達之餘，更要留意各本地騎師的參賽馬！

　　第十場潘頓騎摩廐「盈威勇士」，今仗馬兒初上三班，田草1800米也性能未明，但季內三捷氣勢盛，必成眾矢之的，潘頓放棄「佳景良駒」而就之，這代表後駒是籮底貨嗎？事實上，剛戰「佳景良駒」雖跑第七，但追勢不俗，只因起步落腳慢，加上沿途蝕位兼有擠阻，才姍姍來遲，但牠僅負三個身位，成績較想像中好，今改配滇仔，必定乏人問津，小心是上日「醒少少」擒「辣得醒」之翻版！

　　再講第七場賽事，潘頓騎「醒目精伶」略嫌樹大招風，反之同場「皇仁勁駒」火燒唔熱，牠跑泥地1200米一戰即勝，性能有根據，上仗轉爭谷草落敗，今次回師泥地有力變身！