閃耀小子機會重現

猪拉多纳

　　谷草C+3欄跑道狹窄，本來特別利內檔馬，但係，場地有變，唔係好快地，情況未必樂觀，內欄場地未必着數，事關好多時雨中作賽或慢地，一眾騎師通常唔要欄，個個走晒出便，好似內欄有鬼咁！所以，今晚內檔馬抵唔抵買，真係要諗清諗楚。

　　第一場五班1000米。「好笑容」實力唔高，註定要在五班搵食，四班要好有形勢幫助先至有個P。今次係回降五班第3仗，繼續跑谷草最短途，排檔以今仗最好，2檔起步好易貼欄自己帶，只要內側「龍東至尊」唔係從中作梗，早段同佢鬥放，相信憑藉此駒速高及路程性能，有權直領到底，隔晚有10倍8倍，WP博得過。

　　第二場四班1200米。「閃耀小子」上季取兩W，今季成績平平，跑到目前位置都未入過，整體好失望，衰邊瓣？可能進度唔理想，又可能足疾影響，不過，近兩仗表現愈來愈好，陣上走勢明顯較季初吸引，若果進度返嚟，此匹分利馬必具爭勝資格。

　　第六場四班1650米。「競駿才子」發完燒跑兩場，表現一再令人失望，但又冇試過輸得遠，其實可以有兩種睇法，其一，評分已沒有上升空間；其二，進度未回復作戰水準。

　　而照阿棟睇，此馬分數應該未盡，或者之前健康有事，才令陣上走勢普通。今仗轉爭一哩，路程性能未詳，但潘頓忽然接番手，好似有動靜，一於跟埋今場。