車仔兵疲 難擋曼城

猪拉多纳

溫布萊激爆冠軍前哨戰

英格蘭足總盃4強提前上演王者對決，英超兩大富豪球會車路士同曼城會師溫布萊，由於另一條線對手實力差幾班，故今場無疑係冠軍前哨戰，勝方等如執住半隻盃耳，兩軍爭勝決心毋庸置疑。車路士面對超級魔鬼賽程，任你點樣輪換都難免有疲態，呢場勝負分野就係體能狀況，曼城呢瓣完全贏晒，小讓平半可捧上盤！

(now 633周日晚11時直播)
16日砌６場鐵人都散

車路士替工主帥賓尼迪斯喺魔鬼賽程下發揮輪換大帝本色，留放得宜，班波喺多場重要大戰都交到貨，包括上圈重賽砌低勁敵曼聯，上場歐霸盃次回合計啱晒數輸波晉級，「肥賓」賽後不知幾滿意，大讚班兵輸得夠專業。車仔上場派出尼敦阿基、班拿約同保羅費拉拿等後備兵，個別主力得以唞唞，但大衞雷斯同拉美利斯等主力仍要落場搏殺，由於射手丹巴巴亞有傷未必踢得，復甦嘅「王子」費蘭度托利斯隨時要連搏兩場，唔攰就假啦！

車路士一向軍容龐大，但真係有級數嘅球員查實只得十五、六人，老臣子泰利同林柏特呢期更被投閒置散，「肥賓」實際可用嘅球員唔多，去到季尾階段16日連砌6場，鐵人都死啦！預期佢哋早段都可同曼城抗衡，但搏到下半場中後段就好難講喇。車仔左閘艾殊利高爾同中堅加利卡希爾仍要養傷，後備左閘賴恩貝特蘭病愈可望復出，呢位哥仔鬥弱旅尚可助攻助守，但未夠班喺大戰擔當重任，好有機會成為敵軍重點攻擊對象。
拿斯尼阿古路着晒火

另一邊廂曼城自歐洲賽畢業後，賽程就勁疏乎，近期一直係一周一賽，教頭文仙尼有充裕時間作出部署，上場作客奧脫福全場佔優技術性擊倒曼聯，贏得極具說服力。雖然中場大腦大衞施華有傷上陣成疑，對球隊組織攻勢確係有啲影響，但好在另一進攻中場拿斯尼近期重拾佳態，射手阿古路傷愈後上場鬥「紅魔」喪爆對手防線射入靚波，充分顯示曼城眾將喺呢個階段已經谷起狀態，戰鬥力好勁，結合佢哋近4戰車路士3勝1和嘅靚績，讓平半必捧上盤！

另外要留意英足盃4強不設重賽，賽和將加時30分鐘，再和就互射12碼，換言之今仗兩支「藍軍」只能活一隊。
歐洲莊家睇淡藍戰士

睇番歐洲菠菜公司今場開盤動向，由曼城讓波到車路士讓波都有，而且唔只讓平半，去到讓半球、半一、一球甚至一球／球半都有，畀球迷多啲選擇，咁當然賠率亦會相應調整。不過，有一點要注意嘅係，車仔讓波嘅盤普遍較少，而愛爾蘭莊家Paddy Power初盤有車仔讓平半盤，但賣到昨日就封咗盤，似乎認為「藍戰士」讓唔起喎！
往績旺半場和半場細

車、曼兩軍近年甚少於盃賽碰頭，最近一次為今季初嘅社區盾，當時車路士於領先1比0下，因有伊雲洛域領紅牌被逐反輸2比3，比賽場地同樣係溫布萊。如果計埋聯賽成績，對上6次碰頭曼城稍為佔優，取得3勝1和2負，其中有5場開出「半場和」，開「半場細」亦有5次，呢啲數據值得參考。