喜鵲推黑貓落水

猪拉多纳

新特蘭征打吡 狂人冇牌靠把口

今晚英超頭場爆發東北打吡暨護級關鍵六分波，紐卡素主場迎戰死敵新特蘭。「黑貓」新特蘭改由狂人教頭迪肯尼奧領軍後重拾戰意，但大軍受到傷停問題打擊，缺少首席射手史提芬費查冇晒火力，護級有心無力，「喜鵲」紐卡素棒打死敵態度積極，蘇豪認為捧主勝搵到食！（有線300及200台周日晚7時直播）

新特蘭下半季食咗瀉藥瘋狂失分，一月尾至今聯賽九戰未嘗一勝，上次改由迪肯尼奧領軍作客車路士又輸一比二，單從陣上表現所見，班波鬥心確係好咗，總算稍有起色。今周東北打吡對新特蘭意義重大，佢哋既要砌低對手攞威，亦想拉埋死敵落水齊齊護級，「黑貓」現時同尾三韋根同得三十一分，紐卡素只領先新特蘭五分，今場若然輸波都幾牙煙o架！

今場係迪肯尼奧真正考牌之作，佢當然想威番鋪啦，但新特蘭現時人腳嚴重不整，中場繼續缺少養緊傷嘅隊長卡達莫掃波，重炮格力加特拿就要坐波監，一對中場主將都唔踢得，攻守都唔掂。前面仲大鑊，首席射手史提芬費查未好番，年輕前鋒域咸同另一箭頭丹尼格拉咸都有輕傷，後者一月由史雲斯加盟後同班隊友格格不入，就算落到場都冇乜作為。
賓艾化復出　紐卡素攻力增

紐卡素又點先？佢哋剛於歐霸盃搏殺失手畀賓菲加淘汰出局，不過班波踢落起碼有個勢，左腳王賓艾化傷愈復出喺右路威脅極大，配合連續三場有士哥嘅弗爆射手柏比斯施斯，論攻力好過對手多多聲。「喜鵲」亦有隊長高洛仙尼養傷，但影響唔算好大，大軍近七次主場出擊贏五場，連勁旅車路士都贏到，死緊一半嘅「病貓」邊係佢哋對手吖！
迪肯尼奧餘下６場當打仗

新特蘭主帥「狂人」迪肯尼奧，球隊今晚將與紐卡素上演「東北打吡」，迪肯尼奧賽前表示今場波唔係六分波而係十分波。
近16次東北打吡僅1勝

新特蘭現時只以得失球差壓住韋根排倒數第四位，但「黑貓」已九場不勝，迪肯尼奧認為球隊餘下六場賽事係戰爭，勝出才可以脫離降班漩渦：「今場賽事官方係計三分，但我覺得贏紐卡素係值十分。我哋贏六場波就可以勝出呢場戰事，球季結束戰事就結束，就算對手唔係紐卡素，呢場仍然係戰爭。如果球隊降班，我會係一隻驢子並且講拜拜，但我相信自己係一隻良駒，可以帶領球隊成功護級。」

新特蘭過去十三年都未試過作客贏「東北打吡」，雙方最近十六次交手都只係贏過一場，但迪肯尼奧認為球隊有足夠潛力壓過紐卡素成為「東北一哥」，球迷們又信唔信呢？