奧格斯堡周日波特醒

猪拉多纳

歐聯抽咗籤，全西或全德決賽有機會發生，若然真係由多蒙特對拜仁的話，英格蘭借出溫布萊球場作為決賽場地真係不是味兒，居然畀死敵喺自己地頭發威！雖然德甲冠軍已定，但歐洲賽資格及護級組都競爭激烈，今晚奧格斯堡同法蘭克福理論上都各自要為搶分努力，小妹就比較睇好主場嘅奧格斯堡。
法蘭克福放軟手腳

數字上法蘭克福係要爭分踢歐洲賽，但佢哋畀我感覺係唔多進取，去到季中夠分已經留晒手，最近八場只係贏過包尾嘅格雷特霍夫，當中有六場連波都入唔到！從「陰謀論」咁講，原來法蘭克福教頭韋亞出生地係奧格斯堡，曾經係奧格斯堡嘅球員同教練，唔知會唔會念舊情而放一放水？不過就算唔係放水，以球隊近期嘅走勢加上作客，實在無乜理由支持法蘭克福。

睇番上兩場奧格斯堡精華，佢哋其實踢得唔差，中場都經常組織到攻勢埋門，可惜兩場加埋三十八次埋門、二十二次中龍，但都係入得兩球，最麻煩都係球隊唯一尖刀摩達斯呢排狀態麻麻！但餘下嘅賽事奧格斯堡根本不容再失，暫時距離安全線五分嘅佢哋務必全力爭勝，唔係季尾要踢護級附加賽就麻煩。但有一個好得意嘅數據，原來佢哋今季喺周日出戰未嘗一敗，今次有主場之利，希望摩達斯今晚發威，小妹一於同佢哋共存亡！（有線61及64台周日晚11時30分直播）

Kit 推介：奧格斯堡 上盤