侯斯頓戴拿模滅火破紀錄

猪拉多纳

圖創主場35仗不敗

今晚得4度着晒羽絨凍到震，聽日28度剝晒衫褲都熱到暈，天氣剎那間咁大變化，落場比賽梗係蝕晒底啦！聽朝美職芝加哥火燄作客侯斯頓戴拿模，客軍就要承受如此強烈天氣變化，加上撞正戴拿模要創主場不敗紀錄，今場唔使諗，阿King捧主W！

（周一清晨5時開賽）

自11年6月中起，侯斯頓戴拿模喺主場就順風順水，連盃賽在內已經34場未輸過，追平皇家鹽湖城喺11年所創下嘅紀錄，今場只要唔輸，就可以留名美職史冊。教練杜米歷堅尼亞話明，大軍絕對唔會以不敗為目標，佢希望以勝利嚟紀錄呢個歷史時刻。王牌前鋒韋爾布恩已經傷愈，今場可落場搏殺，另一大將奧斯卡加斯亞雖上陣成疑，但新將戴華亞絕對可以代替佢嘅位置。
芝加哥火燄難敵「溫差」

芝加哥火燄教頭哥柏斯賽前都話難踢到暈：「戴拿模主場當然勁，但我哋更怕天氣變化。芝加哥依家得4度，但休斯敦有28度，濕度仲要去到74％，我哋好難90分鐘都保持水準。」火燄上仗雖反勝紅牛，取得本季聯賽首勝，但本季作客曾吞銀河四蛋，而且兩次客戰都冇入過波，今場揀主W啱數。

另一場美職波特蘭伐木者主場鬥聖荷西地震，主隊新教頭波達有料到，目前球隊士氣一流，可順利贏波。瑞典超方面，赫根主場鬥佐加頓斯，赫根開咧兩場不勝，但整體演出唔曳，主場求勝心夠飢渴，贏波冇難度。