馬得利撥亂反正

猪拉多纳

　　一連幾次賽事跑谷草，賽果時冷時熱，爆到40、50倍冷W又有，熱到3倍以下一樣贏到，到底今次賽事又會如何？睇落未必會似剛剛日馬，賽果可能各走極端，原因好簡單，唔使好複雜去左度右度，事關一望今次8場出馬形勢，只得一個「亂」字。

　　第二場四班1200米。「馬得利」連續3仗轉戰中距離賽事，屢戰屢跑，得出結果係目前未係好時機轉路程。方仔別無他法，還原基本步，回到曾勝谷草1200米，處理夠果斷。難得潘頓肯騎，證明縮程唔係隨隨便便部署，排到好位又令機會提高，成績有望止跌回升。

　　第六場四班1200米。「金鎗俠」馬仔細細，跑得幾場，斷定到將來成就唔會太高，但在三四班唔會冇得爭，而呢匹馬有個好大缺點，陣上內閃問題極之嚴重，所以，唔係一般騎師發揮得到，安國倫呢類級數騎師先至可以勝任。今仗轉到谷草，本來唔多睇好，好在排1檔，又肯縮程，兩項轉變均有利爭勝，有力打開勝門。

　　第七場二班2200米。「安賞」今季贏過1場，正正係此程，之後搏來搏去都係得個P，實力好似見盡，但係上場打吡大賽居然可力迫「事事為王」，演出比預期叻得多，可知跑至季尾，尚且有點進步。今次回到最強路程，對手大多冇經驗，一來一回，此馬佔得路程性能上優勢，贏面唔細。