終極搶救QPR雷丁今日拔喉?

猪拉多纳

英超榜尾兩弱昆士柏流浪（QPR）及雷丁可謂同病相憐，聯賽33戰過後各得24分，雙雙落後安全線達10分之多，現時處於極度危殆狀態。兩軍周六晚分途出擊，昆士柏流浪主場對史篤城，雷丁就會作客諾域治，佢哋今輪若然未能搶到救命三分，睇怕都可提前拔喉宣告不治！兩軍面對沉重壓力，可惜球員有心無力，護級前途一片灰暗。
QPR士氣曳讓唔起史篤城

尾二嘅昆士柏流浪搵到英倫護級大帝夏利列納領軍，無奈隊內充斥高薪懶人，今次夏利叔都冇計，大軍降班危機深重，隊員各懷鬼胎搵定後路。班波本身已經唔係好，家陣將士仲有離心，難有作為，主場出戰讓唔起同樣要護級嘅史篤城，捧「讓球客勝」！

(有線63台周六晚10時直播)

夏利列納捧住護級專家招牌入主QPR，喺冬季轉會窗落足嘴頭叫老細開水喉簽下雷米及基斯杜化森巴等猛將幫手，仲大打人情牌喺舊會熱刺引入贊拿斯同安祖斯唐辛，人腳唔曳。夏利叔要做嘅都做晒，但計漏咗QPR陣內有保辛華呢類高薪懶鬼，球隊現時降班機會極高，有球員打定輸數，放晒風話唔會踢英冠，夏利叔即時發火痛斥佢哋交出咁嘅水平冇資格打英超，隊內氣氛真係麻麻。
150周年會慶唔衰得

論近況史篤城仲曳過QPR，佢哋近7場聯賽僅得1分，已跌至尾五，僅領先尾3韋根3分，真係危危乎！今年正值史篤城創會150周年，若然最終搞到降班贈「慶」，全軍將士都會成為千古罪人，教頭佩尼斯肯定唔想孭呢隻大鑊。

不過，依家QPR有如一盤散沙，連大舊中堅基斯杜化森巴都甩甩漏漏，史篤城只要做好防務，再喺死球尋找士哥機會，絕對有力保持不敗，「讓球客勝」好路。
雷丁唔識入波捧諾域治主W

雷丁管理層喺護級關鍵時刻改由修咸頓舊帥艾堅斯帶隊，變得太遲，得嗰一頭半個月時間，神仙難救！雷丁近仗防守稍有進步，但艾帥都係醫唔好球隊進攻乏力嘅死症，今次作客諾域治都係無力反抗，撐「金絲雀」主W送佢哋一程！

（有線305台周六晚10時直播）

雷丁上月尾搵咗艾堅斯救亡，佢帶領修咸頓由英甲殺上英超，絕對係有料之人，但球隊人腳唔掂，佢無法即時幫班波變身。艾帥領軍3戰拎到1分，上場對利物浦憑後備門神阿歷士麥卡菲上晒身至逼和對手，整體演出進步不大。佢哋近7場聯賽入3球，一球係對維拉時對手擺烏龍，另外兩粒由中場笠臣簡奴建功，家陣呢位仁兄傷埋，睇唔出佢哋有乜士哥本錢。
金絲雀近況有起色

諾域治戰至季尾立晒油，現時亦處降班邊緣，只領先尾三韋根4分，隨時被拖落水，唔搏唔掂。「金絲雀」上場作客阿仙奴守得超好，換邊後更偷雞成功領先，但撐到尾段被一個問題12碼玩謝，最終臨尾香輸1比3，但證明近況有起色，今次回師威力強勁嘅主場，對手又換成鋒力極弱嘅雷丁，條件咁四正，呢場唔贏仲等幾時先？