QPR頹「細」撼史篤城

猪拉多纳

搶分失敗護級渺茫

今晚英超上演護級大戰，由已經送咗入「ICU」嘅昆士柏流浪（QPR）主場迎戰情況危殆嘅史篤城。QPR依家同尾4嘅阿士東維拉相差10分，最壞情況係今輪賽事完結後就篤定降班！史篤城近況差勁，再唔搶分下季隨時留唔住喺英超，今晚相信係一場「細」均力敵嘅比賽，史篤城一向守強攻弱，一於向1.6倍入球細埋手。

（有線63周六晚10:00直播）
史篤城近14場得1勝

其實QPR下半季表現唔曳曾見護級曙光，可惜近幾場關鍵大戰，作客維拉同富咸都輸波，對韋根更加完場前被追和，今仗佢哋如果輸波，其他護級對手又贏晒嘅話，最快周二凌晨就篤定降班，相信領隊夏利列納亦心知大勢已去。QPR今仗前線有森莫亞停賽，少咗個大隻佬衝鋒陷陣對鋒力必有影響，不過後防有基斯杜化森巴坐鎮，加埋門將施薩索拉斯夠穩，有力頂住史篤城麻麻嘅鋒線。

史篤城一向踢法硬朗，憑藉唔錯嘅防守力同對手周旋，喺季中一度打入前十位。不過下半季踢到走晒樣，近14場聯賽竟然僅得1勝，入波亦只得11球，即係話每場都入波都唔到一球，高治、謝路美同約拿芬禾達斯等鋒將冇料到，鋒力疲弱相信係佢哋走下坡嘅主因，今晚個入球細相當好路啦！