曼城上盤趁熱食

猪拉多纳

降魔拆車 重拾霸氣

是日英超早場上演矚目大戰，熱刺主場鬥曼城，熱刺季尾搏殘冇晒氣勢，已成強弩之末，即使王牌球星加里夫巴利復出都幫唔到幾多。曼城經過連場大戰贏波重拾霸氣，作客讓平半，盤口超級硬淨，蘇豪撐曼城再下一城，捧上盤！（有線200及300台周日晚8時30分直播）

熱刺少帥保亞斯好大喜功，乜都要爭，下半季兼顧英超同歐霸盃雙線作戰，並冇作出適當輪換，猛將加里夫巴利場場搏到甩轆，早前於歐霸盃受傷，抖咗兩場仲未回復百分百狀態，今場又要出嚟搏過，射手迪科爾同樣傷愈冇耐，都要頂硬上候命，好唔人道。熱刺本月十二日打完歐霸盃休戰至今，有超過一星期回氣，體力唔成問題，弊在班波愈踢愈沉，對上七戰僅贏一場，無復勇態，惡極有限！

曼城情況完全唔同，大軍下半季將矛頭擺喺足總盃，教頭文仙尼部署得宜，季尾全力谷起球員狀態，佢哋早前作客曼聯一戰贏得精彩，搏起上嚟如狼似虎，令「紅魔鬼」陷入苦戰。大軍前仗喺足總盃重頭戲再次技術性擊倒車路士，演出非常對辦，今次作客熱刺睇落難踢，但預期佢哋都會佔上風。曼城主力射手阿古路同中場指揮官大衞施華有傷，但泰維斯同拿斯尼等攻擊球員弗到爆，夠本錢強攻對手。
近4對賽贏晒熱刺

睇埋往績，曼城近四次對熱刺一場不漏全部贏晒，包括上季作客白鹿徑球場大勝五比一，射手迪斯高食出「大四喜」威過威士忌，踢落完全冇得揮。曼城今場若然輸波，曼聯嚟緊周二凌晨贏埋阿士東維拉即可提前封王，曼城為咗唔畀死敵開心得咁早，佢哋必會奮力一戰，大軍質態都在熱刺之上，有力反客為主！