拉科運到畢勝無歸

猪拉多纳

「超級拉科」返晒嚟喇！原本以為無藥可救嘅拉科魯尼亞，忽然嚟個鯉魚翻身，四連勝暫時擺脫降班區域，連老將華拿朗、馬真拿近期都踢到曉飛，明顯行緊好運，加上仍未夠分上岸，今晚於西甲主場迎戰無欲無求嘅畢爾包，一定食住個勢搶得就搶，小讓平半上盤非常值博。

（now 632周日晚11時直播）

正所謂好波不如好運，之前九場不勝的拉科，自三月中於加利西亞打吡戰勇挫切爾達後，啲運突然返晒嚟，之後連贏馬略卡、薩拉戈薩及利雲特，其中前兩者更係護級勁敵，令該隊由包尾一躍升至第十六位，連老弱殘兵華拿朗、馬真拿、文路爾柏保路都有超水準嘅演出，其中論盡中堅馬真拿變身得分後衞頻有士哥，證明行運行到落腳趾尾。
畢爾包作客曳戰意成疑

拉科氣勢之盛仲勁過巴塞，依家拉科只係領先尾三的薩拉戈薩兩分，仍需為護級搶分，眾將爭勝鬥心唔需要懷疑，面對作客成績十分唔掂、喺聯賽亦冇乜嘢爭嘅畢爾包，必想乘勢再下一城，上盤值得捧場。

壓軸尾場「三哥」馬德里體育會作客西維爾，係人都知西軍主場勁到無倫，其中箭頭尼格度堪稱「比斯桑殺手」，因為呢位大舊佬在比斯桑球場分外sharp醒，近六次於自己地頭踢聯賽共省八粒，但馬體會仍想反壓同市死敵皇馬奪聯賽亞軍，一對前鋒拍檔法卡奧同迪亞高哥斯達亦唔係善男信女，三人大鬥射術下，勢必擦出火花，呢場寧捧大盤。