西維爾 馬體會Goal手鬥入波

猪拉多纳

今晚西甲重頭戲，西維爾喺主場迎戰馬德里體育會。西維爾今季喺西盃被馬體會淘汰，趁住大佬尼格度入球停不了，今晚本應係復仇嘅好機會，可惜對家馬體會近排全面回勇，射手法卡奧同迪亞高哥斯達仲鬼咁合拍，既然兩軍都有「Goal手」壓陣，玩1.9倍入球大最穩陣。

（now632台周一凌晨3:00直播）
尼格度單挑哥斯達 法卡奧

西維爾近6戰有3勝2和1負，齋計主場嘅話，更加係3連勝喪入10球，唔講得笑！嗰10個入波裏面，首席射手尼格度獨取6球弗到冇朋友，加埋翼鋒雷恩斯同上仗梅開二度嘅拿傑迪錫，呢條鋒線要喺馬體會身上入波唔係難事。最重要一點，係西維爾近14場比賽入面，只得一場總入球係少過2.5球嘅中位數，可以話「大」咗9成。

馬體會早前喺歐霸盃畀魯賓卡山淘汰出局，宣布衞冕失敗。雖然係咁，但呢班波已經穩袋下季歐聯入場券，都算交足功課吖。事實上，馬體會近3次對西維爾不敗入咗8球，家陣撞啱兩位前鋒法卡奧同迪亞高哥斯達腳風順，今鋪造訪西維爾，贏唔贏到就話難估啫，但要隊番一、兩粒絕對唔難囉！