好友福換人必拼

猪拉多纳

　　昨日賭博士高度讚揚鄭俊偉，指他既有實力，更有魄力，乃值得重視的馬房之一。結果話口未完，米高鄭繼剛戰「熱爆男」告捷後，翌日移師鄰埠再創佳績，憑「齊歡笑」捧走澳港盃，風頭一時無兩。

　　既然手風大順，兼且殺得性起，可期鄭廐馬明晚續有攻勢。賭博士環顧今次鄭廐六駒，第三場「尚合金龍」和第七場「好友福」最有睇頭。大家不妨睇睇，其餘四匹鄭廐馬「發達心聲」、「好爽趣」、「光輝出擊」和「好勝煌」，無獨有偶均沿用上手騎師，偏偏前兩駒換人而戰，動態確是非比尋常。

　　先講「尚合金龍」，至今六戰俱三甲不入，卻以上仗跑第五成績最好。走勢稍現曙光後，今次即由湯智傑換上郭立基，戰鬥力提升之餘，本身更初降五班作賽，由蟲變龍絕非妄想。鄭廐馬勝在火燒唔熱，縱使搏殺手影盡露，預計埋門亦有好分頭，成冷值得一博。

　　再講「好友福」，今季屢戰無功，七歲馬里程盡矣，猶幸性賦忠心，憑質常跑三三四四。今場霍勵賢冇馬騎，米高鄭仍決意換人，召來鬥志最盛的潘頓，明眼人一睇就知砌梗，十檔亦無所懼。