多蒙特受讓嗒糖

猪拉多纳

群蜂圍螫！銀河艦隊勢遭黃禍！

今晚歐聯4強首回合爆發第二場「德西」對決，97年盟主多蒙特坐鎮西法倫球場迎戰9屆冠軍皇家馬德里，雙方今屆曾於分組賽兩度交鋒，「蜜蜂兵團」取得1勝1和，當時其積極逼搶加快速反擊的踢法，逼到皇馬有氣冇碇抖，況且「銀河艦隊」目前傷兵一大籮，作客仲要讓波真係離晒譜，「讓球主勝」捧得過。

（有線61及201台周四凌晨2時45分直播）
瘋狂逼搶戰術奏效

論人腳同牌面多蒙特當然唔及皇馬，但就連一向牙擦的「寸王」莫連奴都話「蜜蜂兵團」有捧走歐聯獎盃嘅實力，就知呢班波唔係善男信女，由今屆分組賽兩鬥皇馬可見，多蒙特教頭高普睇穿「銀河艦隊」不擅長陣地戰嘅弱點，因此佢喺分組賽嗰陣刻意將陣型稍為移後，誘敵深入，唔畀C朗、迪馬利亞有空間打反擊。

由於多蒙特眾將大多年輕力壯，加上冇乜心理壓力，結果將高普瘋狂圍堵逼搶嘅戰術發揮得淋漓盡致，一搶到波就以馬高列奧斯、馬里奧葛斯等快馬打反擊，結果搞到皇馬陣腳大亂，主客兩場不敗絕非靠運氣。
莫連奴唔敢太冒進

「銀河艦隊」近況唔錯，近15仗贏足12場，氣勢如虹，可惜上仗聯賽對貝迪斯一役卻損兵折將，先後有馬些路、卡維奴、賓施馬、莫迪歷、迪亞高洛迪古斯受傷，據報後三者仲可紮住披甲，但未必有托弗表現，後備前鋒希古恩又缺態，加上主帥莫連奴領教過多蒙特嘅厲害之後，作客必以穩行先唔敢冒進，但面對一班「大黃蜂」圍剿轟炸，不惜氣力咁搶截，隨時連控住個波組織攻勢都有難度，點樣打反擊呢？

可以咁講，多蒙特係一支快速版皇馬，但「蜜蜂兵團」對皇馬中場樞紐、德國同胞奧斯爾及基迪拉熟晒路，只要截斷二人同沙比阿朗素為首的輸血管，C朗於前場便威力大減。皇馬今仗作客要讓波純係受名牌效應拖累，其實冇乜優勢，建議捧「讓球主勝」。