ＦＣ廣州搶金大打真軍

猪拉多纳

今日有八場亞冠盃分組賽，F組FC廣州（廣州恒大）作客日本浦和紅鑽，唔輸多過兩球都可出線，難免令人懷疑佢哋爭勝決心不足。不過咁又未必，因為FC廣州成績同獎金掛鈎，贏少粒球員都收少咗錢，所以場場都打真軍。浦和紅鑽出線形勢危急，更加冇失分空間，預料雙方會搏拳，捧入球大。

（廣東體育頻道周三晚6時30分直播）

「中超曼城」FC廣州財大氣粗，一向奉行「銀彈政策」，除咗重金請來意大利名帥納比，羅致巴里奧斯等球星之外，贏波、捧盃獎金亦相當豐厚，這正是目前喺F組一枝獨秀嘅主因。內地傳媒指FC廣州今場可能輸波出線，有不願透露姓名嘅主將即時反駁，話球隊成績同獎金掛鈎，甚至連得失球差都計算，所以每場都會贏到盡。
紅鑽爭出線焗攻

事實上，FC廣州今屆4場分組賽已攻入12球，平均一場入3球，淨靠自己都夠開大盤，何況浦和紅鑽亦要焗攻搶分，佢哋落後次席全北汽車兩分，若然今仗贏唔到，而全北汽車勝出，紅鑽就會出局，根本冇得選擇，必須豁出去求三分，有利製造入球。

同組南韓球隊全北汽車主場對小組最弱嘅泰國代表蒙通聯，當然唔會放過贏波良機，甚至有力大炒對手，捧「讓球主勝」。