皇馬復仇者鐵籠蜂暴

猪拉多纳

歐聯4強首回合 再爆德西對決

歐聯「德西對決」續集上演！被視為4強中實力最弱嘅多蒙特，今晚首回合會先喺主場迎戰皇家馬德里。雖然兩軍今屆分組賽碰頭，多蒙特以1勝1和成績佔優，不過嚟到淘汰賽就唔同講法，皇馬教練莫連奴向來係戰術大師，而且「銀河艦隊」早就將捧歐聯列為頭號目標，C朗、賓施馬同希古恩幾支大炮蓄勢待發，皇馬有力憑質素搞掂班「鐵籠蜜蜂」，成功復仇，一於直取2.43倍客勝！

（有線61、64、201及203、中央5台周四凌晨2:45直播）

分組賽嗰陣，多蒙特先喺主場贏皇馬2:1、作客就2:2逼和對手，「蜜蜂軍團」最後更以首名出線，令好多人都覺得皇馬根本係畀人食到應一應。不過大家唔好忘記，當時嘅「銀河艦隊」正值低潮期，戰績唔能夠作準，況且分組賽踢法同淘汰賽係兩回事，皇馬當日有冇出盡全力？唔怕次名出線定有保留？答案根本冇人知。
淘汰賽專家莫連奴吼晒路

講真，自從「銀河艦隊」放棄西甲後，喺盃賽同歐聯都愈戰愈勇，論經驗，連續第三年殺入四強嘅皇馬當然贏多蒙特幾條街啦，加上莫連奴靠歐洲賽起家，呢位戰術大師對淘汰賽不嬲極有心得，佢上星期仲飛埋去德國睇多蒙特吼路，備戰工夫做到足。最重要一點，係葡萄牙球星C朗踏入2013年後全面爆發，連賓施馬同希古恩嘅狀態都返晒嚟，呢個喪攻「三叉戟」，非一般對手可以頂得住。
多蒙特歐戰經驗輸幾條街

對家多蒙特今季表現都唔曳，教練高普仲自爆「極速」秘訣，全靠「鐵籠足球」添（見另文），但話分兩頭，比起對上兩季贏德甲冠軍，阿占認為班「鐵籠戰士」嘅穩定性弱咗好多，成日要靠馬里奧葛斯做救世主，最慘葛斯仔又宣布來季正式加盟拜仁，唔多唔少打擊軍心，即使睇番佢哋上圈爭議性淘汰馬拉加嗰場波，「鐵籠蜂暴」根本冇晒威力，「絕殺英雄」菲臘比辛坦拿助攻叻過防守，點靠得住先？大家可以諗一諗，多蒙特近年嘅歐戰經驗只係今季同上季入分組賽，班後生仔見唔慣大場面，鬥馬拉加都差啲出事，今鋪面對再高一級嘅皇馬，睇怕都冇運行咯。
Data King

C朗歐聯喪入波

連國內盃賽及聯賽在內，多蒙特主場已取得7連勝。

「蜜蜂軍團」於今季歐聯仍然保持不敗身。

連分組賽在內，C朗連續5場歐聯有波入。

皇馬喺今屆歐聯作客場場都有失波。
乜都玩錦囊

對賽旺開「半大」跟多鋪

兩軍同樣都係進攻型球隊，分組賽嗰陣佢哋2次交鋒都鬥得燦爛，相信今晚都唔會例外。翻查紀錄，兩軍近4次喺歐聯交手，當中有3次踢咗半場就已經出現至少2個入球，喺今屆分組賽更連續2次開出「半場大」，有條黃金路，個2.3倍「半場大」不妨跟多轉。

頂占筍盤：皇馬（客勝）