熱刺上盤唔怕根

猪拉多纳

「尹佬」發力選情告急 巴利砌盡拉票

英超進入最後直路，隨住蘇亞雷斯咬人被罰停賽10場後，本季英格蘭球員獎項已成加里夫巴利同尹佩斯之爭。尹佩斯上周聯賽連中三元助曼聯奪冠加晒分，大熱門加里夫巴利備受壓力，今輪率領熱刺作客韋根將會施展渾身解數傾力拉票，同時幫球隊爭奪歐聯席位。韋根今季喺主場遇強即屈，熱刺讓平半捧上盤！

（有線300及200台周六晚10時直播）
連儂復出增火力

加里夫巴利月初喺歐霸盃受傷一度以為要收咧，好彩只屬虛驚一場，休戰近半個月後，呢隻英超當紅炸子雞校啱時間上仗復出鬥曼城，單睇陣上表現，條友頂盡得7成狀態，但已經好犀利。佢換邊後交出士哥及助攻各一成為反勝英雄，人紅做乜都順啲。喺英格蘭足球先生及球員先生選舉，加里夫巴利仍佔上風，但勁敵尹佩斯近期來勢洶洶，令佢選情告急，今戰要盡最後努力拉票。

英超季尾其中一個焦點係歐聯席位爭奪戰，3支倫敦球會打崩頭，熱刺踢少場落後阿仙奴兩分暫列第5，比起排第4嘅車路士少1分，形勢唔太差，但餘下賽事不容再失，經過首循環主場爆冷不敵韋根後，今次會打醒十二分精神。大軍賽前傳來利好消息，右翼艾朗連儂傷愈踢得，可以同加里夫巴利雙翼齊飛，加埋上場復出即有士哥嘅迪科爾，呢個最強進攻鐵三角再度合體，大大提高勝算。
韋根對前8戰績曳

韋根落後尾四阿士東維拉3分但打少1場，護級未絕望，佢哋對上兩次主場出擊贏晒，食住個勢今次又會谷前爭勝，不過，今場對手唔係諾域治同紐卡素呢類下游球隊，而係反擊超級煞食嘅熱刺，搶攻隨時死快啲。仲有一點值得留意，韋根本季聯賽主場遇強戰績極曳，7戰頭8位球隊錄得1和6負，面對Top4曼聯、曼城、阿仙奴同車路士全敗兼零士哥，對住熱刺無力偷雞，受讓冇着數，都係鋤弱扶強捧熱刺上盤啦！