冇哨牙蘇紅軍讓唔起紐卡素

猪拉多纳

埋門一腳靠佢、攻擊發電機又係佢，利物浦冇咗「哨牙蘇」攻力起碼打7折，作客又點讓波先？英超利物浦造訪紐卡素，蘇亞雷斯由今仗起停賽10場，佢本季包辦球隊幾達4成入球，「喜鵲」唔使招呼佢，受讓平半捧下盤！

（有線300及200台周日凌晨零時30分直播）

紅軍成也「哨牙蘇」、敗也「哨牙蘇」，非利物浦球迷好多都對佢好反感，就連己隊粉絲亦對佢又愛又恨。本季利物浦前線幾乎由蘇亞雷斯一個踢晒，61個聯賽入波中佢擸咗23球，另外佢盤扭出色，經常拉散對手防線助攻隊友，紅軍冇咗佢攻力必定銳減。上仗佢咬伊雲洛域被重判停賽10場，引起軒然大波，連首相卡梅倫都話佢教壞細路，近日領隊羅渣士同門將連拿都話足總針對「哨牙蘇」，但谷埋成啖氣尋日會方又決定唔為佢上訴，職球員心情跌宕，加上依家連爭歐霸嘅機會亦名存實亡，利物浦戰意實在所剩無幾。

紐卡素雖然亦有高洛仙尼同門將告魯爾缺陣，但有中場硬漢迪奧迪復出，賓艾化亦於後備席隨時候命。況且「喜鵲」仍須搶分護級，近兩次主場對賽亦贏晒紅軍，今場必揀下盤。