愛華頓正氣主場起筷

猪拉多纳

上周提過愛華頓作客表現一般，結果輸畀深陷護級漩渦的新特蘭，前四歐聯夢亦告幻滅。不過「拖肥糖」出名硬淨，應贏則贏非常正氣，重返葛迪遜公園球場迎戰hea到暈的富咸，又係起筷時候。

（有線303及203台周六晚10時直播）

愛華頓於葛迪遜公園球場有幾堅？曼城、熱刺、西布朗、甚至新鮮出爐的聯賽冠軍曼聯，都先後喪師於此，今季聯賽只有車路士嚟到呢度能贏波而回，可以見識到乜嘢係主場之利。領隊莫耶斯擅長限米煮限飯，雖然爭歐霸席位亦好渺茫，但呢班波一向鬥心足，唔理對乜嘢對手都甚少欺場，由費蘭尼、謝拉域、巴尼斯、派拿等所組成的鋒線，配合前場不斷壓迫的打法，絕對不能小覷。
富咸hea踢唔夠揪

相反富咸自從上岸之後，眾將已經有等收咧的心態，上仗領紅的中場悍將薛維爾亦要坐波監，防線前少咗一道屏障，加上進攻太倚賴貝碧托夫，最近「hea碧」故態復萌即刻死晒火，導致近四仗輸三場兼冇士哥（所入的一球係烏龍波）。季尾波鬥志行先，面對無心戀戰的富咸，相信愛華頓可以在主場大勝一場。