弗賴堡遭瓜分 難擋拜仁

猪拉多纳

已提前獲德甲冠軍嘅拜仁慕尼黑主場迎戰弗賴堡，拜仁有歐聯後顧，今晚一定盡用副選，不過佢哋嘅副選比大部分德甲球隊嘅主力更有級數，而且對比賽更加飢渴，主場有力擊退面臨星散嘅弗賴堡，「讓球主勝」可視為過關重心。

（有線61及64台周六晚9時30分直播）

德甲班會組班向來有自己一套，好多時都不假外求，而且球會等級鮮明，A級隊會挖角B級隊精英，喺C級隊踢得好嘅又會畀B級隊吸納。臨近季尾，呢個循環又開始運行，拜仁已公布以3,700萬歐元轉會費挖得多蒙特「金童」馬里奧葛斯，多蒙特就準備搵慕遜加柏新星靴爾文取代，而慕遜加柏就公布簽咗弗賴堡嘅進攻中場麥斯古斯。

弗賴堡近兩季以小球會身份交出超乎理想佳績，有表現嘅球員自然搶手，球季未完，半隊主力已經被列強瓜分，除咗麥斯古斯外，中場真羅辛度同富隆已經雙雙簽咗法蘭克福，翼鋒卡利古尼落實轉投禾夫斯堡，連19歲嘅中後場新星馬菲亞斯真達都同多蒙特及阿仙奴傾緊。唔只球員，帶領球會六年，協助球隊升班嘅體育經理杜夫納都畀人挖角，喺星期二同漢諾威傾掂數。弗賴堡上下都忙於轉會，仲邊有心情踢波，近期喺德國盃同德甲連續兩場打吡戰都輸畀史特加，狀態好唔掂。
拜仁二線兵鑊氣更勁

拜仁下周中作客魯營球場踢歐聯準決賽次回合，今晚會大輪換，但佢哋班後備季尾出場時間多咗，狀態愈嚟愈勁，喺歐聯八強首回合對祖雲達斯同四強首回合對巴塞之前，拜仁起用二線兵，結果先後大炒漢堡9比2同漢諾威6:1，認真得人驚。何況佢哋近9次主場弗賴堡贏晒，上季主場仲贏到7比0，呢個時候嘅弗賴堡又邊有得揮呢？