熱刺韋根「大」鬥法

猪拉多纳

爭歐聯 求護級都要搶分

韋根今晚喺英超主場對熱刺，要吼1.72倍入球大，事關韋根要搶分護級，熱刺要贏波踢歐聯，呢個時候碰頭唔會玩死守。更何況，聽日係公布英格蘭球員先生選舉結果大日子，相信熱刺王牌加里夫巴利會踩行油省多幾粒，為自己爭獎造勢！

（有線200及300、廣東體育周六晚10:00直播）
韋根中堅打柴防線危

最近韋根安排來自馬德里體育會嘅祖爾盧保斯，代替艾哈比斯把關，防線的確有改善。可惜吖，中堅艾卡拉斯上星期對紐卡素傷咗，可能連足總盃決賽都唔踢得，令到佢哋嘅後防更加信唔過。雖然韋根有舒卓拿頂上，但佢最佳位置始終唔係中堅，家陣佢哋要搶分護級，主場顧得攻嚟，要佢哋唔失波又真係好難。
熱刺巴利復出即嚟料

對手熱刺上星期有加里夫巴利復出，即刻醒晒以3:1反勝曼城，重燃進軍下屆歐聯希望。或者大家都睇得出，加里夫巴利其實未好番晒，爆炸力好似差咗啲，不過聽日佢好有可能首次當選英格蘭球員先生，唔糟質韋根造勢，真係對唔住自己同球迷，以佢嘅卡士對付韋根又使乜100%狀態？隨時又入波！

除此之外，迪科爾上星期避過高柏尼勁射入網為熱刺反超前，證明已經操番起，今場好有可能代替冇料到嘅艾迪巴約打正選，加上艾朗連儂都話好番可以候命，依家熱刺嘅進攻武器當然更加多，根本唔愁冇波入，撞啱佢哋近14場得1場冇失波，防線非常兒戲，既然入得又失得，對住都要搏命嘅韋根，玩入球大當然最穩陣啦！
韋根主場失波冠英超

‧韋根今季英超主場失波最多。

‧熱刺連開5場入球大。

‧熱刺近5場每場至少入2球。

‧加里夫巴利近3次對韋根入3球。