櫻花「壓力煲」炸大分

猪拉多纳

今日場（六）2大阪櫻花對大分三神，可以話係日職嘅「櫻花內訌」，事關大分有唔少主將係櫻花嘅出品，呢場波大佬打細佬，櫻花應該可以攞到聯賽4月份首勝嘞啩，2.3倍「讓球主勝」抵玩。

櫻花响3月係威係勢，點知一踏入4月，即刻變咗另一隊波，除咗日聯盃取得勝負各一，聯賽3戰衰到得1和2負，今日再贏唔到嘅話，4月份就要食白果，班人又點會唔緊張吖，賽前櫻花班人都呱呱嘈話唔贏唔得。

其實單純講往績，櫻花又真係唔多食得住大分，最近7次主場對賽，佢哋同大分打成3勝1和3負，大家咁高咁大。不過，盛產新人嘅櫻花，原來一直以嚟醒咗唔少球員畀大分，好似依家大分嘅骨幹兒玉新、森島康仁、小松壘、阪田章裕、丹野研太以至教頭田坂和昭，全部都係「Made in Cerezo」，兩邊非常熟對方路數，今季回歸日職嘅大分，踢到家陣都未贏過，只係靠和波吊命唔使包尾，又點頂得順急於贏波嘅大佬呢？

仲有樣至緊要嘅係，櫻花今年裝修過個主場嘅座位，主隊自由席座位由1,200個加到2,200個，容納更多死忠Fans，令呢個向來有「壓力煲」之稱嘅主場，比以前更加聲勢浩大，對客隊形成嘅壓力勁過以前多多聲，大分呢勻真係輸少過兩球都願。