黑貓決心大噬硬維拉

猪拉多纳

迪帥：護到級唔識游水都跳海

今晚英超獨腳戲由兩支護級分子上演，阿士東維拉會喺主場迎戰新特蘭，客軍主帥迪肯尼奧賽前豪言如果成功護級，就會即時跳海慶祝！「黑貓」喺呢位新帥領軍下戰績進步有目共睹，絕對有力搶分向「上岸」目標進發，受讓平半必敲1.91倍下盤！

（有線200及300周二凌晨3:00直播）

「新狂人」迪肯尼奧空降新特蘭，雖然一度因為政治立場惹嚟爭議，但佢上任後「黑貓」戰績確實有起色，由佢領軍嘅3戰除咗僅負車路士外，作客死敵紐卡素同埋主場鬥今季勁掂嘅愛華頓，同樣贏波之餘更保持零失球，球員鬥心亦都明顯大大提升，其中施斯隆更連續2仗有「士哥」，拍住喺新體系下如魚得水嘅阿當莊臣，絕對有力憑強勁氣勢搞掂護級對手維拉。
煲賽事DVD 當歐聯決賽踢

喺賽前通宵研究維拉賽事DVD制訂戰術嘅迪肯尼奧話，好希望成功護級，家陣當正呢場波係佢哋嘅「歐聯決賽」咁踢，明顯勁有決心！佢仲貫徹「癲喪」風格向英國《衞報》表示：「我唔識游水，不過我哋護到級嗰日我就會跳落海，咁就可以知自己識唔識喺水面度行，哈哈！希望我識啦！」新特蘭班球員聽到主帥玩到咁大，相信都好想睇佢表演，梗係會夾手夾腳「成人之美」啦！

至於維拉近期雖然贏過昆士柏流浪同史篤城，不過戰績一直唔多穩定，佢哋最大嘅問題係防守曳，連續23場正式賽事失波，場均失球高達1.85球，面對鬥心爆棚嘅「黑貓」真係未必有運行喇！
維拉對賽贏得少

‧兩軍近8場同樣有5戰開出入球大。

‧兩軍近6次對賽，維拉僅得1勝。

‧近6次喺維拉主場對賽，新特蘭有4戰不敗。