銀河艦隊絕地大反擊

猪拉多纳

C朗有火帶頭滅蜂

C朗被屈嬲爆要發火！歐聯4強次回合，「銀河艦隊」皇家馬德里主場「蜜蜂兵團」對多蒙特，皇馬首回合輸1比4，今仗冇得保留焗攻，近日王牌射手C朗被指上仗對多蒙特之前搵女「爆房」，玩到腳仔軟累球隊輸波，形象受損當然火都嚟埋，今仗絕對唔會輕言放棄，誓要證明自己有幾堅。多蒙特輸兩球都可以晉級，決心唔夠皇馬堅，皇馬讓一球捧上盤。

（有線61及201台周三凌晨2時45分直播）

近日英媒大爆C朗喺上周出戰多蒙特前48小時，喺馬德里酒店同巴西「美臀小姐」Andressa Urach「爆房」偷情，Andressa Urach仲大讚C朗個幾鐘嘅「表現」近乎完美，講到似層層咁，雖然C朗一向風流，但畀你屈賽前掛住「爆房」咁冇品就勢係假，佢已經澄清冇咁嘅事，不過最佳證明，梗係踢番場好波，將皇馬從歐聯出局邊緣拖番出嚟，上演一場精彩嘅大逆轉，以佢咁好勝嘅性格，今仗一定分外落力。

翻查紀錄，皇馬曾於75/76年球季歐冠盃（歐聯前身）16強首回合作客1比4不敵英格蘭球隊打比郡，次回合主場大勝5比1。另外，喺85/86年球季歐洲足協盃（歐霸盃前身）16強首回合，作客1比5慘敗畀慕遜加柏，次回合返主場贏4比0，憑作客入球優惠晉級，最後仲捧埋盃，非常戲劇性。咁啱今次歐聯又係大比數落後畀德國球隊，隨時歷史重演唔出奇。
多蒙特歐聯作客曳

唔好忘記，另一支西甲球隊拉科魯尼亞喺03/04年球季歐聯8強首回合，作客1比4不敵AC米蘭，次回合贏4比0。所以皇馬落後1比4，並非冇得救，尤其係取得一粒作客入球，贏3比0都掂，以基斯坦奴朗拿度精湛射術，足以攻陷多蒙特大門。

況且多蒙特領先三球，唔需要冒進，甚至可能採取穩健戰術，力保勝果，屆時或會被皇馬控制戰局。多蒙特大把在手，而且佢哋今屆歐聯五場作客僅一勝，預料踢唔出首回合主場銳氣，皇馬有力挽回面子。
晉級條件(多首回合勝4:1)

皇馬晉級

‧勝3:0

‧淨勝4球或以上

‧勝4:1，需加時分勝負

多蒙特晉級

‧勝或和

‧以1球或2球差距落敗

‧以3球差距落敗，但取得2個或以上作客入球

‧負1:4，需加時分勝負