西甲雙雄的兩個出線機會

猪拉多纳

Peter今次送一啲抵死啜核嘅金句畀大家，演繹歐聯西甲雙雄同NBA球隊湖人嘅命運！

歐聯西甲雙雄出線機會有兩個，「渺茫」同「冇可能」！多蒙特首回合以雷霆萬鈞姿態大勝，若果大家問我今晚皇馬喺莫連奴帶領下反勝機會如何，Peter只會實牙實齒作答，就算有都係渺茫機會，始終要如日方中嘅多蒙特大敗唔係易事，皇馬即使有決心，晉級前景都係「渺茫」。
湖人今年行衰運

另一場冇咗哥迪奧拿領軍嘅巴塞隆拿今季表現褪色，球王美斯受傷，兩大重心沙維同恩尼斯達明顯退步，對住小弟認為現時係歐洲最強嘅拜仁，睇怕都難有作為。拜仁目前處於完美狀態，就算巴塞要贏番4比0都難啦，所以佢哋係「冇可能」翻生！

NBA方面，湖人畀馬刺四場全炒出局，呢班波現時實力薄弱，教練又冇料，今年佢哋係有運啊，可惜全部都係衰運呢！Good luck同Bad luck都係luck，但湖人今年只有Bad luck，事實係要成為冠軍有好多元素，絕非有錢就掂。

人生總有高低潮，辛辛苦苦喺好市時賺到多少，衰起上嚟可於股災一鋪清袋。球隊亦係一樣，湖人係NBA近年最成功嘅球隊，但佢哋依家低處未算低，作為擁躉，當然望球隊盡快反彈，但積落咁多問題，相信湖人未來五年命運有如利物浦一樣，名氣一定有，擁躉一定有，但成績未必有。

金句：西甲雙雄出線機會有兩個，「渺茫」同「冇可能」！湖人今年有運，可惜全部都係「衰運」！