皇馬絕地反擊打殘內亂蜜蜂

猪拉多纳

「衰不過三」寸王變陣創奇迹

歐聯4強首回合作客慘輸多蒙特1:4嘅皇家馬德里，今晚返去巴拿貝主場上演絕地反擊，小弟覺得皇馬有一個作客入球喺手，要反勝唔係冇機會。正所謂「衰不過三」，莫連奴今鋪決定變陣破敵，適逢多蒙特爆內亂，皇馬2.17倍「讓主」抵捧。同我一樣信奇迹嘅不妨博埋4.9倍「皇馬晉級」！

（有線61、64、201及203、中央5台周三凌晨2:45直播）

多蒙特今屆連分組賽在內，3戰皇馬得2勝1和，但其實皇馬都有4次攻破多蒙特大門，咁既然多蒙特主場可以大炒皇馬，點解「銀河艦隊」返去主場唔可以大勝番場先？況且皇馬仲有一個作客入球在手，隨時會成為救命波。
莫帥搵華拉尼嘜羅拔仔

擅於激勵球員嘅莫連奴，賽前講明假如皇馬出局係佢嘅責任，但若果成功入決賽，就絕對係球員嘅功勞，認真識做。今鋪畀「寸王」重新部署，首回合睇唔住羅拔利雲度夫斯基嘅比比或者收起，改派小將華拉尼盯住「羅拔仔」可能仲好，至於艾辛就會頂替有傷嘅艾比路亞。

「羅拔仔」上場食出「大四喜」後，神射手排名一下子憑累積10球彈上第2位，比C朗只少2球。C朗為保歐聯金靴個寶座，唔理皇馬仲有無得踢，今場都會搏晒命。至於首回合因添丁遲咗歸隊做後備嘅迪馬利亞，今場會復任正選，佢啱啱喺馬德里打吡就幫皇馬攻入致勝一球，有「天使」鋪橋搭路，加埋莫迪歷頂替基迪拉擔正，C朗唔憂冇輸送。
多蒙特防線靠唔住

多蒙特自從馬里奧葛斯宣布下季過檔拜仁慕尼黑後，唔少多蒙特球迷炮轟佢係叛徒，甚至燒爛佢件波衫洩憤，最慘係連隊友「羅拔仔」都話下季一定走人，呢啲說話真係好打擊士氣o架！其實多蒙特本身後防都好有問題，菲臘比辛坦拿防守力麻麻，連曉姆斯上場都有自殺式回傳，咁只要皇馬發揮出水平，邊個話反勝係天方夜譚o架！

首回合︰皇客負1:4

頂占筍盤：皇家馬德里（讓球主勝）

+ 晉級球隊︰主隊