仙台維加泰蘇哥利

猪拉多纳

盼贏波獻教練亡母

亞冠盃E組賽事日職代表仙台維加泰主場對中超大軍FC江蘇，維加泰主帥手倉森誠媽媽上周末過身，佢希望以一場勝仗獻亡母，大軍今場贏波有望晉級，爭勝決心極大。至於江蘇就開出1,100萬人仔獎金刺激士氣，但佢哋近六戰不勝零士哥，睇怕都係有心無力，一於熱捧主勝！

（中央5台周三晚6時30分直播）

仙台維加泰主帥手倉森誠媽媽上周末不敵癌魔去世，享年七十六歲，佢媽媽係維加泰忠實支持者，呢位教頭強忍傷痛繼續領軍征戰，上場聯賽希望以勝利獻亡母，可惜未能如願，今次希望可以補中。維加泰大軍收拾心情備戰亞冠盃關鍵戰役，佢哋目前與武里南聯同得六分，對賽不分高下，今場贏波之餘更要爭取士哥，咁先夠穩陣，爭勝決心唔使懷疑。
FC江蘇低迷 重賞都難救

另一邊廂FC江蘇係各支中超代表之中最弱嗰隊，暫時只得四分包尾，數字上仲有機會爭出線，會方開出巨額獎金，今場贏波有500萬人仔，若然成功晉級就可獲得額外600萬人民幣，加埋有成1,100萬，望以重賞振奮士氣。不過，江蘇近期狀態低迷，聯賽連亞冠盃六戰不勝，最大鑊係一球都入唔到，鋒力咁鬼弱，相信都係拎唔到筆獎金o架喇。