車仔巴素利對攻大駁火

猪拉多纳

歐霸盃奪標大熱車路士喺四強戰次回合回師史丹福橋主場，迎戰瑞士大軍巴素利，車仔今屆極重視歐霸盃戰線，首回合作客好認真咁贏二比一，返到主場唔會縮埋保住勝局咁衰仔。巴素利谷前搶攻後防必穿窿，預期今戰都會多士哥，入球大屬投X首選！

（有線61、64、201及203台周五凌晨3時05分直播）

車路士季尾餘下兩大任務，既要霸住英超前四位置爭取來屆歐聯席位，同時要兼顧歐霸盃戰線。兩大老臣子泰利同林柏特聯賽均被投閒置散，反而成為歐霸盃重要旗子，主帥賓尼迪斯於頻密賽程下經常作出輪換，現時隊內球員普遍狀態唔錯。大軍首回合作客巴素利只屬五五波，最終憑巴西兵大衞雷斯士哥奠勝，堅贏質素，冇得傾。
巴素利攻強守弱焗住搏

巴素利喺八強踢走英超實力分子熱刺，戰鬥力當然唔曳，大軍陣內擁有唔少優質進攻球員，兩翼穆罕默德沙拿同史托卡側擊威脅大，中鋒馬高史達拿亦有分量，計攻力絕對唔弱，佢哋首回合令車仔門前險象環生，足見班波有料到。巴素利最大弱點係後防不穩，今次防線主力德高域停賽，作客谷前大把空間畀對手打反擊，想唔失波都幾難。

睇番今場盤口，車路士讓緊一球，不過佢哋和波都可晉級，讓咁多唔抵玩。巴素利今場小勝一比○都會出局，入兩球係基本消費，即使領先一粒都要繼續攻，而車仔就會睇準時機反擊，射手費蘭度托利斯已經回勇，速度同把握力都有改善，成為隊中危險人物。呢場橫計掂計都係鬥攻格局，玩大盤啱數。
晉級條件（車首回合勝2：1）

車路士晉級

‧勝或和

‧負0:1

‧負1:2，需加時分勝負

巴素利晉級

‧淨勝2球或以上

‧以1球差距勝出、並取得3個或以上作客入球

‧勝2:1，需加時分勝負