賓菲加主場「大」反擊

猪拉多纳

歐霸盃4強次回合今晚上演，葡超勁旅賓菲加首回合作客輸畀費倫巴治0:1後，教練捷西斯喪插條失晒準嘅鋒線，今晚返主場想反勝晉級，賓菲加就必須再次展現佢哋強大嘅攻擊力，奧斯卡卡度素等射手今晚肯定要交貨，咁啱費倫巴治都有古積特等經驗豐富嘅前鋒，睇怕都會係入球騷，一於捧1.68倍「入球大」！

（有線62及202周五凌晨3:05直播）
龍門fb上載打氣片

賓菲加主場威力相當驚人，今季只係喺分組賽輸過畀巴塞隆拿，近5仗主場賽事更加喪入17球！上次作客土耳其條鋒線離奇失準，全場只得「新C朗」奧斯華度加坦一次埋門似樣，但畀教練省完相信唔會再甩拖，門將阿度亞賽前更喺facebook上載打氣片鼓勵隊友，賓菲加有大把士哥能手喺度，入球唔使憂，唯一擔心係後防隊長安達臣雷沙奧仍受傷患困擾，相信佢哋今場更加會以攻代守。

費倫巴治方面，前鋒有荷蘭球星古積特同踢過祖雲達斯嘅卡錫，夠晒實力同卡士，雖然喀麥隆射手韋保同中場魯爾梅利斯受傷未必踢得，但要知道對上一次有土耳其球隊打入歐洲賽決賽，已經係加拉塔沙雷2000年殺入歐洲足協盃嗰次，費倫巴治要重演呢段輝煌歷史，今場當然唔會坐以待斃，力爭作客入球先係最穩陣嘅方法，今場兩隊都係靠強大火力食胡，玩「入球大」冇甩拖！

首回合：賓客負0:1
頂占筍盤：賓菲加（入球大）