明尼路旗開得「聖」

猪拉多纳

歐霸盃今晚激鬥連場，其實聽朝南美自由盃16強首回合同樣精彩，其中（四）5場巴甲內戰聖保羅主場對明尼路，客隊有巨星朗拿甸奴復出孭飛，受讓平半1.96倍下盤抵玩到震！
朗拿甸奴復出孭飛

雖然話上月中佢哋喺分組賽交手，當時聖保羅主場贏2:0，但查實當日挾住5戰全勝出戰嘅明尼路，根本已經出咗線無心戀戰，反而聖保羅要贏波先掂，明尼路戰意不足落敗係非戰之罪。不過今時唔同往日，16強首回合再戰點會有情講？最緊要係上周中為巴西國家隊披甲嘅細哨，上周末獲球會放假陪阿媽，佢話家陣心情大靚兼狀態十足，只要細哨落場有貨交，點會輸得畀實力差一截嘅聖保羅？

另一場同樣來自巴甲嘅富明尼斯，就作客厄瓜多爾勁旅艾美歷克，作客高原肯定難打。富明尼斯大腦迪高涉禁藥案今鋪冇隨隊出征，受讓平半都唔着數，寧捧對家2.02倍上盤。
自由盃賽制

採主客兩回合制，今輪為16強首回合。兩回合計打和將計算作客入球優惠，未分勝負將於次回合法定時間後互射12碼決勝。