維拉乘勇再搶諾域治

猪拉多纳

護級生死鬥三路興兵

英超護級形勢緊湊場場戲肉，三支形勢最惡劣嘅韋根、紐卡素及阿士東維拉今晚分途出擊，其中維拉上場大炒新特蘭後士氣大振，作客對住近況一般嘅諾域治有力再下一城，受讓平半必捧下盤。

（有線302及202台周六晚10時直播）

目前榜末形勢，昆士柏流浪、雷丁已篤定降班，排18位嘅韋根雖然積分較少，但比其餘護級對手少踢一場，形勢上仲未絕望。其實計近況，幾支護級球隊之中以維拉最弗，就算唔計上場大勝新特蘭6比1，佢哋由二月份起計近11場聯賽輸咗4次，但對手分別係曼聯、利物浦、曼城及阿仙奴幾支實力分子，面對同級隊伍絕對有贏波把握。比利時箭頭賓迪基啱啱打破球會史上單季入波最高紀錄，腳風順到不得了，對住鬆散嘅諾域治防線有力再爭取士哥。
今季兩鬥諾軍未輸過

「金絲雀」諾域治數字上仲未肯定上岸，不過佢哋對落仲有四支球隊需要搶分護級，降班壓力未算太大，決心反而不及場場要搏嘅維拉。維拉現時領隊林拔，09至12年係諾域治主帥，對「金絲雀」熟到爛，故雙方今季兩次交手諾域治未贏過，聯賽首循環作客打和1比1，英聯盃主場更被維拉大炒4比1，主場出擊都冇優勢，今仗讓波必捧對家。