曼城超班照史雲斯

猪拉多纳

細鬼多次重申，季尾必揀「鬥志波」，如果班波位處中游、無欲無求，唔反佢都絕對不宜捧場。英超史雲斯主場鬥曼城，主隊已穩奪歐霸資格、客軍嘅亞軍位置亦穩陣，咁點揀先？當然要睇番實力啦，曼城質素超班，冇心理壓力下更啱發揮，捧客勝。

（有線300及200台周六晚10時直播）

本季史雲斯經歷換帥，個個都睇死佢哋唔掂，但最後令人大跌眼鏡，新領隊米高盧特立有料到，前鋒米捷更踢到曉飛，最後攞埋英聯盃並取得來屆歐霸盃席位，球季可謂超額完成。史軍達標後，球員已提早放暑假，近六戰二和四負，面對勁旅阿仙奴、熱刺、車路士輸晒，簡直hea到爆炸，面對曼城又點得住？
文帥要攞威保飯碗

曼城衞冕失敗，老闆、球迷、贊助商都好失望，領隊文仙尼為保飯碗，未來幾場聯賽肯定繼續打鞭催谷隊波。近期泰維斯、阿古路都弗，大衞施華亦已復出，今仗就算作客亦夠贏，客勝可放心捧。