屈福特搶直升大走列斯聯

猪拉多纳

英冠去到煞科一戰，邊隊直接升班、邊幾隊打升班附加賽、邊兩隊陪「布城」降班，今晚就有分曉！屈福特、侯城力爭另一個直接升班席位，屈軍狀態回勇勢兇夾狼，主場將同列斯聯鬥入波，捧大盤；侯城hea踢過度自討苦吃，主場鬥卡迪夫城吼細！

（周六晚7時45分開賽）

英冠賽例，冠、亞軍直接升班，第三至六名打升班附加賽。今晚「升班組」形勢緊湊，次席侯城領先第三屈福特一分，如果侯城贏唔到卡迪夫城，好大機會跌到第三。故今戰侯城心理壓力極大，就算有主場之利，亦佔唔到幾多甜頭。
侯城鬥卡城捱「細」界

「卡城」於英冠有超班之勢，又夠正氣，上仗於篤定升班下都唔輸畀大勇嘅保頓；反觀侯城守強於攻，踢到季尾以為亞軍位置坐定粒六，就吓吓唔去，近三仗鬥聯賽榜倒數三弱都贏唔到，真係離晒大譜。今場預料只能贏控球率，最終老鼠拉龜、冇碇埋手。兩軍近三仗都開細，呢場唔會例外。

相比下，屈福特比侯城更值得直接升班，呢班波打法具侵略性，以近七成開大率成英冠「大王」，近兩仗回復水準，鬥布力般同李斯特城都開「贏＋大」。現時屈福特僅落後侯城一分，今輪迎戰列斯聯目標清晰，領隊蘇拿肯定落柯打搶攻。列斯聯新帥麥達莫，亦希望於煞科戰省靚招牌，於零心理壓力下必同對手鬥攻，大盤捧得過。