史特加搵霍夫keep狀態

猪拉多纳

德甲史特加主場對格雷特霍夫，原本係例行公事，但對於史特加主帥拉巴迪亞嚟講，卻極有意義，格雷特霍夫係佢執教生涯唯一有亮點嘅球隊，而史特加目前唯一要做嘅，就係盡可能維持狀態同提升球隊士氣，做好準備迎接德國盃決賽，主場可以輕取格雷特霍夫，1.6倍主Ｗ係過關重心，進取啲可以捧埋2.55倍「讓球主勝」。

（周六晚9時30分開賽）
拉巴迪亞勝在有運

喺Oliver眼中，拉巴迪亞係一個講叻過做嘅教練，格雷特霍夫係佢第一間執教嘅職業球會，當年喺德乙憑開放式進攻攞到唔錯成績，得到好評，佢推銷嘅理念因而令到好多球隊都充滿憧憬，因而得以成為德甲主帥，不過其後佢喺利華古遜同漢堡都教唔掂，如今去到史特加，講表現亦係水準以下，球隊踏入2013年，喺聯賽踢14場波輸咗八場，有好多場都踢得極差，甚至因為佢調動無方致敗，不過呢個世界永遠唔公平，有料不如有運，史特加因為抽到靚籤得以殺入德國盃決賽，又因為對手係穩奪下屆歐聯席位嘅聯賽冠軍拜仁，所以史特加自動取得下屆歐霸盃參賽資格，佢嘅帥位又可以坐耐啲。目前史特加喺聯賽冇乜壓力，今晚雖然有尼達美亞同伊比斯域停賽，但主場遇弱旅已經夠殺有餘。

格雷特霍夫篤定降班，球隊亦面臨四散，近期班球員為爭取表現博留喺德甲落班，已經有啲各自為戰感覺，上仗主場面對「作客蟲」漢諾威同對手對攻輸波，今晚作客對住史特加繼續開放，相信都係凶多吉少。
Oliver 推介：

史特加勝 ★★★★★

漢諾威大 ★★★

拜仁慕尼黑勝 ★★★