摩家軍殺氣騰騰

猪拉多纳

　　大摩時常出馬不多，偶然在1期之內，可能出馬得一兩匹，譬如大前仗全晚只得兩駒上陣。但每當這個馬房出馬大陣仗之日，通常唔會空手而回，呢種情況在季內已經屢見不鮮。

　　今次大摩出馬12匹，唔講得係隻隻硬嘢，不過，好多場皆有爭勝籌碼，而且，大摩又以馬海戰術圍剿對手，總共有4場出馬多於1駒，如果咁樣陣式都會全日「靜蠅蠅」，真係我欲無言！

　　第七場「同個夢想」及第九場「小宇宙」有一個共通點，兩駒季內仍未搵到第1W，時至季末，交代概念濃，加上此兩駒近績出色，應該唔會縮槓。

　　第五場「醒目精伶」初出即勝，之後就同馬迷玩捉迷藏，近兩仗在谷草及田泥仲跑到冇位置，今次終於生生性性！重返贏馬路程，如果今場再唔掂，可能留到下季先用。

　　風花雪月鎮守尾關

　　第十場「風花雪月」，正正路路唔使估，呢件綵衣今日出馬唔只1隻，呢匹熱門守尾關，必然醒醒定定，事實上場贏得又真係堅喎。Jack