大運財1600米最強

猪拉多纳

　　今日有兩場級際賽上演，第6場係本地賽，出馬爆滿，反觀第8場冠軍一哩，出馬9匹，外隊只得2駒，的確冷清，唔知與今屆冇贊助有冇關連 ？！ 作為馬會，但凡盃賽，好應該辦得有聲有色，唔能夠厚此薄彼，就如上周女皇盃整日熱熱鬧鬧，與今日相比實在太大分別，會方必須正視。

　　第四場四班1200米。「寶寶飛龍」一條心想搏出頭，跑完上場唔急於再出，有充分日子休息，期間一路操一路等賽程，潘頓亦經常摸住，十分重視呢匹3歲馬。今次排檔係最好1次，而對手一係平平無奇，一係排檔差，以馬論馬，應該輪到佢擔正。

　　第七場三班1400米。「同個夢想」真係欠運，唔係本身實力有問題，經常都出現追人唔切鏡頭，若果陣中際遇稍為好少少，莫講話1W，可能手上已有兩場頭馬了！

　　今次唔再跑1200米，加程一試，希望跑長啲，好追啲，究竟大摩如意算盤打唔打得響？阿棟唔敢一口咬定，不過，大摩呢類馬未贏之前往往有用不完氣力，鬥志可信。

　　第八場一級賽1600米。「大運財」愈跑愈進步，大前仗贏香港經典一哩賽，其實有啲好彩，先至頂得住「蒜頭仔」。不過，之後跑兩場較長路程賽事，留後或略為跟前一樣掂，板斧有變化，係進步最佳證明。今仗回到首本路程，正好試試本身實力去到邊，有賠率可以買WP。